Gofal iechyd
Mae gan y DU drefniadau â rhai gwledydd i roi lefel benodol o ofal iechyd i wladolion y gwledydd hynny pan fyddan nhw yn y DU. Yn aml, dim ond gofal meddygol mewn argyfwng sy’n gallu cael ei roi yn hyn o beth. Dylech wastad sicrhau bod gennych chi’r yswiriant iawn ar gyfer holl gyfnod eich ymweliad â’r DU.
Efallai na fydd y trefniadau gofal iechyd a restrir isod yn berthnasol i rai costau sy’n gysylltiedig â gofal iechyd, ac nid ydyn nhw’n cymryd lle yswiriant gofal iechyd. Os byddwch chi’n teithio o wlad sydd heb ei chynnwys yn y trefniadau isod, yna rhaid i’ch yswiriant gofal iechyd allu darparu ar eich cyfer mewn achosion pan fydd costau gofal iechyd sydd heb eu rhagweld.
- Dinasyddion yr UE ac EFTA
-
Mae gan y DU a’r UE drefniant ar gyfer darpariaeth gofal iechyd dwyochrog. Bydd eich Cerdyn Yswiriant Iechyd Ewropeaidd (EHIC) yn parhau’n ddilys yn y DU. Efallai na fydd hyn yn darparu ar gyfer dinasyddion y Gymdeithas Fasnach Rydd Ewropeaidd (EFTA). Ymhlith gwledydd EFTA, mae Norwy, Gwlad yr Iâ, Liechtenstein a’r Swistir. Darllenwch mwy am ddefnyddio gwasanaethau goffal iechyd fel ymwelwyr â’r DU o'r UE a gwledydd EFTA.
- Dinasyddion o’r tu allan i’r UE
-
Mae gan y DU drefniadau gofal iechyd dwyochrog â nifer o wledydd y tu allan i’r UE. Bydd cyfyngiadau yn berthnasol i bob trefniant unigol, a’r rheini’n benodol i’r wlad dan sylw.
Darllenwch mwy am ba driniaeth feddygol y gall pobl o’r tu allan i’r UE a’r tu allan i EFTA ddisgwyl ei chael o dan y trefniadau gofal iechyd dwyochrog fan hyn.
Covid-19
Mae Covid-19 wedi tarfu ar sut rydyn ni’n gweithio yn lleol ac yn fyd-eang. Mae modd gosod cyfyngiadau Covid-19 yn gyflym, ynghyd â’u llacio’n gyflym, a dylech chi fonitro’r sefyllfa wrth gynllunio, a pharhau i fonitro’n rheolaidd tan y dyddiad pan fyddwch chi’n teithio. Wrth gynllunio eich ymweliad creadigol â’r DU, dylech roi amser ychwanegol ac arian wrth gefn ar gyfer pethau na chafodd eu rhagweld ac a achosir gan Covid-19. Er enghraifft, gall profion Covid-19 fod yn ddrud, a phe baech chi’n cael eich heintio gan Covid-19, efallai y bydd angen i chi fod dan gwarantin, a gallai hynny olygu costau ychwanegol sylweddol. Os ydych chi’n teithio i’r DU fel rhan o sefydliad, neu os ydych chi’n sefydliad sy’n cynnal artistiaid yn y DU, gallai fod yn ddefnyddiol cyflwyno polisi Covid-19 a fydd yn berthnasol i bawb yn y parti sy’n teithio. Dylech fod yn ymwybodol y gallai fod gan gwmnïau awyrennau a chwmnïau teithio eraill eu cyfyngiadau eu hunain y mae’n rhaid cydymffurfio â nhw. Dylech fod yn ymwybodol hefyd o unrhyw reoliadau Covid-19 a allai fodoli yn y wlad y byddwch yn dychwelyd iddi, neu’r wlad y byddwch yn ymweld â hi ar ôl i chi fod yn y DU.
Mae rhywfaint o ganllawiau am Covid-19 wedi cael eu datganoli ym mhedair gwlad y DU: Cymru, Lloegr, Gogledd Iwerddon a’r Alban. Dylech sicrhau eich bod yn ymwybodol o’r rheoliadau a’r cyfyngiadau yn y wlad y byddwch yn ei chyrraedd, ac yn unrhyw wledydd eraill y DU rydych chi’n bwriadu ymweld â nhw. I gael y wybodaeth ddiweddaraf, ewch i’r tudalennau perthnasol isod. Cofiwch fynd i’r tudalennau hyn yn rheolaidd gan y gall y rheolau newid yn sydyn.